काठमाडौं

दशौं महाधिवेशनदेखि निरन्तर चुलिँदै आएको विवाद अन्त्य गर्दै गैरआवासीय नेपाली संघ (एनआरएनए)मा अन्ततः ऐतिहासिक एकता हुने भएको छ । ११औं महाधिवेशनबाट निर्वाचित अध्यक्ष डा. बद्री केसी नेतृत्व र एकताको महाधिवेशनबाट निर्वाचित अध्यक्ष महेश कुमार श्रेष्ठ नेतृत्वबीच भएको विस्तृत छलफल, कानुनी व्याख्या र संस्थागत विश्लेषणपछि पूर्ण सहमति गरिएको बताईएको हो। सहमतिपत्रमा हस्ताक्षर गर्ने कार्यक्रम प्रधानमन्त्री सुशिला कार्कीको प्रत्यक्ष रोहवरमा सम्पन्न हुने तयारी अन्तिम चरणमा पुगेको छ ।एकता सभाको पूर्वसन्ध्यामा दुवै पक्षका शीर्ष नेताहरू काठमाडौं आइपुगेका छन् । एकताको महाधिवेशनबाट निर्वाचित अध्यक्ष महेश श्रेष्ठसहित उपाध्यक्ष खगेन्द्र न्यौपाने, लोक दाहाल, युवा संयोजक भिमसेन थापा, प्रवक्ता गंगाधर गौतमलगायतको टोली काठमाडौंमा लागेको छ । त्यस्तै ११औं महाधिवेशनका अध्यक्ष डा. बद्री केसी, महिला उपाध्यक्ष रोजिना प्रधान राईलगायतका नेताहरू पनि काठमाडौं आईसकेका छन्।

दुवै पक्षले सर्वोच्च अदालतले विभिन्न समयमा गरेको आदेश तथा निर्देशनलाई पूर्ण सम्मान गर्दै संस्थागत वैधता र नेतृत्वको प्रश्नलाई सहमतिको माध्यमबाट अन्तिम टुंगोमा  पुऱ्याउने निर्णय गरेका छन् । अदालतद्वारा मान्यता प्राप्त ११औं महाधिवेशनको नेतृत्व स्वीकार गर्दै, त्यसपछि सर्वोच्च अदालतकै निर्देशनका आधारमा गरिएको एकताको महाधिवेशनबाट निर्वाचित अध्यक्ष महेश श्रेष्ठलाई औपचारिक रूपमा संघको नेतृत्वकारी भूमिकामा पदस्थ गराइने सहमति भएको छ । आगामी ६ महिनाभित्र एनआरएनएको १२औं महाधिवेशन पारदर्शी र पूर्ण विश्वासयोग्य ढंगले सम्पन्न गर्ने साझा प्रतिवद्धता सहमतिपत्रको मुख्य आधार बनेको छ । त्यसका लागि महेश श्रेष्ठको संयोजकत्वमा स्टेअरिङ कमिटी गठन गरिने छ, जसले निर्वाचन, अनुगमन, सदस्यता व्यवस्थापनदेखि न्यायिक समितिसम्मका सबै संयन्त्रलाई व्यवस्थित रूपमा संचालन गर्नेछ । साथै, एमआइएस सिष्टममा देखिएका कमजोरी सुधारेर प्रणालीलाई पूर्ण रूपमा पारदर्शी बनाउन छुट्टै सिष्टम व्यवस्थापन समिति गठन गरिने छ ।अध्यक्ष महेश श्रेष्ठका अनुसार, “यो सहमति केवल नेतृत्व बीचको सम्झौता मात्र होइन, विश्वभर रहेका नेपालीहरूलाई एकताबद्ध बनाउने अभियानको नयाँ आधार हो ।”

दुवै समूहले १०औं र ११औं महाधिवेशनबाट निर्वाचित संरचनाहरूलाई आधिकारिक रूपमा स्वीकार गर्ने निर्णयले संघमा लामो समयदेखि देखिएको विभाजनको अन्त्य हुने संकेत दिएको छ । भविष्यमा नेतृत्व हस्तान्तरण प्रक्रियालाई विधि सम्भत बनाउँदै ११औं महाधिवेशनको प्रतिवेदन डा. बद्री केसीले एकताको महाधिवेशनबाट निर्वाचित अध्यक्ष महेश श्रेष्ठलाई र १२औं महाधिवेशन पूरा भएपछि महेश श्रेष्ठले नयाँ नेतृत्वलाई पद हस्तान्तरण गर्ने व्यवस्था सहमतिको माध्यमबाट सुनिश्चित गरिएको छ । यस्तै, एनआरएनएको वैधानिकता तथा आधिकारिकता सम्बन्धी अदालतमा विचाराधीन मुद्दाहरू समेत आपसी सहमतिमा फिर्ता लिने वा समाधान गर्ने निर्णय भएपछि संघ अब कानुनी विवादहरूको दबाब मुक्त भएर एकीकृत रूपमा अघि बढ्ने मार्ग प्रशस्त भएको छ । सहमतिपत्र परराष्ट्र मन्त्रालयको रोहवरमा हस्ताक्षर गरिनेछ र कुनै पनि विवाद उत्पन्न भए मन्त्रालयकै समन्वयमा समाधान गरिने उल्लेख छ ।त्यस्तै, डा. बद्री केसीले संस्थालाई स्थायित्व, पारदर्शिता र वैधानिकतासहित अघि बढाउन दुवै पक्ष साझा उद्देश्यमा एकजुट भएको बताए ।